Gipaubos sa Civil Aeronautics Board (CAB) ngadto sa Level 16 ang fuel surcharge sa mga airline alang sa Nobyembre 16 hangtud 30, ning tuiga, gikan sa Level 17 nga gipatuman sa unang katunga karong bulan.
Ubos sa bag-ong surcharge bracket ug gamit ang conversion rate nga ₱63.61 matag US dollar, mahimong maningil ang mga airline og ₱525 hangtud ₱1,535 matag pasahero alang sa domestic flights ug ₱1,733.76 hangtud ₱12,891.29 alang sa international flights.
Misunod ang pagpaubos sa ikaduhang sunod-sunod nga senemanang pagkunhod sa presyo sa jet fuel sa tibuok kalibotan, nga mikabat sa $178.95 matag baril niadtong Nobyembre 6, gikan sa $191.54 sa miaging semana, sumala sa datos sa International Air Transport Association (IATA).
Bisan pa sa pagkunhod, nagpabiling mas taas ang fuel surcharge kaysa sa Level 4 nga gipatuman sa wala pa mosaka ang presyo sa lana tungod sa panagbangi sa Middle East niadtong Pebrero 2026, hinungdan nga gipadayon sa CAB ang pagrepaso sa surcharge matag 15 ka adlaw tungod sa pagkausab-usab sa presyo sa jet fuel. (raniel mahunyag)
