CAGAYAN DE ORO CITY – Giawhag ni Most Reverend Jose Cabantan, arsobispo sa Cagayan de Oro ang mga kristiyanos nga puy-an ang gawi sa pagkamapaubsanon sa kinabuhing moagi ra ning kalibutana.
Kini ang mensahe sa arsobispo alayon sa kasaulugan sa pasko sa katawhan sa ning dakbayan.
Miingon si Cabantan nga ang pagkahimugso ni Kristo sa pasungan ang dayag nga sinyales nga angay magpaka-simple ug dili puno sa garbo ang matag-tawo aron dili kini mabutang sa alaot sa pag-abot sa panahon.
Gani,angay usab puy-an ang kasuguan sa gugma nga gibilin ni Kristo ayha kini nabalik sa langitnong amahan sobra 2-mil ka tuig na ang naglabay.
Samtang giawhag usab ni City Mayor Rolando ‘Klarex’ Uy ang katawhan nga sabton ug puy-an ang tinud-anay nga diwa sa kapaskuhan aron mas mapasayon ang pagpaambit sa gugma ngadto sa uban.
Kini ang mensahe sa mayor alayon sa pagsaulog sa katawhan sa kapaskuhan ning tuiga.
Siya miingon nga kon huptan kini sa tawo nga mga gawi,dili lisod kanila ang pakig-sandurot nga malipayon ngadto sa uban.
Dugang sa mayor nga unta iapil sa mga kristiyano sa ilang mga pag-ampo nga kanunay’ng protektahan sa kahitas-an ang dakbayan batok sa bisan unsa nga hadla sa kalautan.
