CAGAYAN DE ORO CITY – Gihagit ni Cagayan de Oro Arcbishop Jose Cabantan,D.D ang kapareha niyang mga obispo ug tanang kaparian nga mahimong istrumento sa grasya sa langitnong kalooy sama sa gipaambit sa giila sa simbahan nga little saint of great mercy nga si Santa Maria Goretti.
Kini ang tipik sa unod sa mensahe ni Cabantan nunot sa iyang pagpangulo sa santos nga misa sa Divine Mercy Shrine kuyog ang mga obispo sa CBCP sa El Salvador City kagabii.
Miingon si Cabantan nga mahimong haw-an ang ilang tahas ug bokasyon kon wala kanila ang gawi sa pagka-mapasayloon ug pagka-maloloy-on sa labing nagkinahanglang mga debotong Kristiyanos.
Hisayrang paghimo nila’g misa sa Divine Mercy Shrine ang apil sa ilang tulo ka adlaw nga 128th CBCP plenary assembly nga gihimo dinhi sa syudad.
