Giduso ni City Councilor ug IP Representative Datu Roberto Cabaring ang usa ka proposed ordinance nga magpalig‑on sa koordinasyon ug kolaborasyon tali sa mga barangay councils ug Indigenous Political Structures o Tribal Councils sa pagsulbad sa mga panaglalis ug sa pagdumala sa Indigenous Cultural Communities.
Atol sa regular session sa City Council kagahapon, gipadayag ni Cabaring nga kabahin sa iyang obserbasyon ang kakulang sa organisadong komunikasyon ug pagsinabtanay tali sa duha ka sektor.
Matod pa niya, ang huyang nga koordinasyon maoy usa sa mga hinungdan sa wala masulbad nga land disputes sa mga barangay sa Palalan, Tablon ug F.S. Catanico.
Gipatin‑aw usab niya nga adunay ubang barangay officials nga wala pa hingpit makasabot sa mandato sa Indigenous Peoples Mandatory Representative (IPMR), nga nakaapekto sa hapsay nga koordinasyon sa tribal councils.
Tungod niini, nagrekomenda si Cabaring og committee hearing uban sa Liga ng mga Barangay ug ubang stakeholders aron mapalambo ang komunikasyon ug mas mapalig‑on ang panagtinabangay sa matag sektor.
