CAGAYAN DE ORO CITY-Kasuhan sa kapolisan sa murder ang Civilian Armed Force Geographical Unit o Cafgu member nga namusil-patay sa brgy tanod sa Brgy Cauyonan, Opol Misamis Oriental.
Sa pakighinabi sa Bombo Radyo,gi-angkon ni Opol Police Office commander Sr/Insp Dennis Flores nga bug-at nga kasong kriminal ang ilang i-file batok kang Filomeno Jabien Jr kinsa nailang aktibong sakop sa Cafgu ubos sa 4ID Phil Army.
Gibutyag Flores nga daghang sibilyan ang mo-testigo sa pagpusil ni Jabien sa biktima nga si Faustino Castillon, 56 anyos, minyo ug nagsilbing Brgy tanod sa maong lugar.
Miingon si Flores nga igo ra gibadlong ug gipakalma ni Castillon apan siya ang gipusil ni Jabien gamit ang M-16 rifle sa miaging gabii.
Samtang namugos ang team leader ni Jabien nga aksidente lamang ang pagka-pusili-patay sa brgy tanod member sa Brgy Cauyonan, Opol,Misamis Oriental.
Kini subay sa gipalugwa nga pahayag ni 4th ID spokesperson 1t Lt. Tere Ingente gikan usab sa opisyal ni Jabien.
Apan gitin-aw ni Ingente nga nagpakanaug na’g kamanduan si 4th ID commander Maj/Gen Ronald Villanueva nga suportahan nila ang imbestigasyon sa PNP kay daghan naka-testigo nga mutudlo kang Jabien nga siya ang mipatay kang Castillon.
Una niini, nangayo’g despensa ang 4ID sa gihimo ni Jabien ilabina sa pamilya ni Castillon. Gisaad ni Ingente nga hatagan sa patas nga tratamento ang kasong pagpatay nga gi-atubang ni Jabien.
