CAGAYAN DE ORO CITY – Nag-atubang sa kasong pagsupak election gun ban ang tulo ka indibidwal nga pulos nakuhaa’g armas sa mismong pagpatuman niini sa magkalahing lugar sa Northern Mindanao.
Miingon si Police Regional Office 10 spokesperson Major Joann Navarro nga gawas sa taga-Bukidnon nga nadakpan mismo sa pagsugod sa election gun ban sa Tagoloan, nakadakop usab ang kapolisan sa sibilyan nga armado sa lungsod sa Villanueva pulos sakop sa Misamis Oriental.
Nadakpan usab ang sakop sa CAFGU nga nagkupot sa homemade Uzi firearm nga gigamita’g bala sa 9mm didto sa Panaon,Misamis Occidental.
Nagpasidaan ang mga otoridad nga likayan magdala’g armas nga wala kinahanglana aron dili madakpan ug makasuhan.
Gilauman sa PRO 10 nga hayan mosaka pa ihap sa gun ban violators sanglit layo ang pagpahigayon sa midterm elections.
