Dako ang paglaom sa pundok sa mga lokal nga taxi operators ug drivers sa dakbayan nga karong tuiga makapadagan na usab sila sa mga e-taxi aron atbangan ang pagsulod sa langyaw nga kompanyang Green GSM.
Matud pa ni CAFITADA President Bernie Jamaca, gikatakda na ang ilang pakigtagbo sa buhatan ni Mayor Rolando “Klarex” Uy ug sa LTFRB Region 10 karong Huwebes alang sa ilang pakig-alayon sa Filipino-based company sa mga e-vehicle nga Hail PH.
Pinaagi sa maong lakang, gilauman sa pundok nga moabot sa 300 ka initial units sa rent-to-own nga e-vehicle ang ilang ipagawas aron matabangan ang panginabuhian sa mga drayber ug sa mga lokal nga operators sa siyudad nga maapektohan sa pagdagan sa GSM taxi nga gipanag-iyahan sa mga langyaw.
Subay niini, gipaningkamotan sa grupo nga masugdan na gyud ang pagpadagan sa maong bag-ong mga sakyanan sa dili pa matapos ang kasamtangang tuig.-
