Gipahayag ni Atty. Roberto Rodrigo, ang legal counsel sa Cagayan de Oro Bulk Water Inc., nga misleading ang mga gipagawas nga findings sa special report sa COA bahin sa ilang mga operasyon.
Gitin-aw niya nga walay kamatuoran ang alegasyon nga mas mahal ang bayranan sa mga konsumidor gumikan sa pag-purchase nila og tubig sa Rio Verde tungod kay pareho ra ang presyo niini kon itandi sa paghimo og kaugalingong water treatment plant.
Mahitungod sa isyu sa pagkalangay sa review, gibutyag ni Atty. Rodrigo nga ang 75 ka adlaw nga gidugayon niini gihimo aron masiguro nga mas thorough ang proseso sa Water District ug tungod usab kini sa pagpaabot sa feedback gikan sa Office of the Government Corporate Counsel (OGCC).
Dugang pa sa abogado, wala say sukaranan ang giingon nga dili igo ang pag-aprobar sa OGCC sa ilang kasabutan gumikan kay kini na man gyud ang naandang pamaagi sa ahensya.
Busa, gipasabot niya nga dili angay nga ipasangil sa Water District o sa ilang kumpanya ang mga isyu nga may kalabutan sa mga guidelines ug desisyon sa maong mga buhatan.
