Nanguna karon ang dakbayan sa Cagayan de Oro sa tibuok nasud sa pinakadaghang na-upload nga mga lokal nga ordinansa ug resolusyon ubos sa digital nga sistema nga e-Legis.
Gipahibalo ni Cagayan de Oro City Vice Mayor ug Vice Mayors’ League of the Philippines National Vice President for Mindanao Jocelyn “Bebot” Rodriguez nga miabot na sa 14,000 ka mga dokumento ang nasulod sa maong platform sulod lamang sa pipila ka bulan human gilusad sa siyudad ang labing unang e-Legis caravan niadtong Agosto.
Gipasabot ni Rodriguez nga dako kini og tabang tungod kay na-preserbar sa sistema ang mga karaan nga balaodnon sukad pa niadtong tuig 1945 nga nangaguba ug nangahanaw na tungod sa kadugayon, imbes nga magmano-mano pa sa pagpangita niini.
Dugtong sa bise mayor nga sa higayon nga maablihan na kini sa publiko, makabenepisyo dili lang ang mga magbabalaod sa mga siyudad ug gagmayng munisipyo kondili lakip usab ang mga estudyante ug katawhan nga nangita og impormasyon alang sa mas paspas nga serbisyo publiko.
