CAGAYAN DE ORO CITY-Nadakpan sa mga operatiba sa Macasandig Police Station 9 ang giilang high valued target nga gikan pa sa syudad sa Iligan City.
Gibutyag ni SPO1 Ryan Sebellino, imbestigador sa Macasandig Police Station nga balor unta sa tunga hangtud usa ka kilong shabu ang ilang mabawi sa dinakpan nga si Joe Beneth Manlupig, hingkod ang panuigon, usa ka call center agent sa kompanyang Concentrix ug molopyo sa Iligan City.
Gibutyag ni Sebellino nga gikan mismo kang Manlupig ang report nga duna siyay gihulatang shabu gikan pa sa Lanao del Sur apan wala kini makalusot sa check point pasulod ning syudad.
Samtang giangkon sa walay duha-duha sa suspek nga si Manlupig ang iya ang walo ka pakete sa gagmay shabu nga nakompiskar sa mga operatiba sa Macasandig Police Station.
Giangkon ni Manlupig nga duna siyay gi-apas nga bayad sa utang nag nagkantidad sa P200-mil.
Tungod kay wala pa man siyay trabaho, iya daw gisulayan nga musulod sa negosyong shabu.
Matud pa suspek nga nagbasol siya sa iyang gihimo tungod kay nagtuo siya nga “easy-money” kon dali ra ang kwarta kung shabu ang i-kontrata.
Una niini, nahitabo ang transaksyon sulod sa usa ka pension house sa dalang Pabayo, ning syudad kagabii.
