CAGAYAN DE ORO CITY-Hapit mabungol ang pari sa Our Lady of Mt. Carmel Cathedral sa pagbusikad bomba nga gikamatay sa 22 ka tawo samtang 117 ang samaran sa Jolo, Sulu.
Miingon si Rev Fr. Ricky Bacolcol,kura paruko sa maong simbahan nga nakurat sila sa dihang kalit mibusikad ang unang bomba samtang nagbasa sa ‘second reading’ ang gitahasan nga diyakono niini.
Gani, tungod sa kahadlok maoy ilang gihimo ang paghapa sulod sa simbahan.
Samtang nagtoo Bacolcol nga adunay kakulangon sa seguridad rason mi-resulta sa pagpamomba sulod sa Our Lady Mt. Carmel Cathedral sa Jolo, Sulu .
Siya miingon nga natingala siya kon nganong nakasulod sa simbahan ang mga terorista bisan sa hugot nga seguridad nga gipatuman sa mga sundalo.
Gisaysay ni Bacolcol kinsa lumad nga taga-Camiguin nga mikawan ang pipila ka bangko sa simbahan tungod sa kakusog sa impact sa maong pagbusikad sa bomba.
Dugtong niini,gi-doble sa kapolisan ug militar ang pagpatuman sa seguridad sa rehiyon partikular sa dakbayan.
Kini human ang pagbusikad sa duha ka bomba sa Our Lady of Mt. Carmel Cathedral Jolo, Sulu.
Nanghinaut si Regional Peace and Order Council -10 chairman City Mayor Oscar Moreno nga masayran sa mga otoridad ang mga responsable sa pagpabusikad aron mapahamtangan sa tukmang silot.
Naglaraw usab nga magtagbo ang mga naglangkob sa RPOC aron higustan ang seguridad nga masigurong dili malutsan ang rehiyon sa mga terorista.
