CAGAYAN DE ORO CITY – Gihulatan ni Police Regional Office 10 Director Brig Gen Jaysen De Guzman ang resulta sa gihimong imbestigasyon sa Cagayan de Oro City Police Office o COCPO kabahin sa pagkaguba sa pultahan sa Cagayan de Oro Water District o COWD sa Corrales Avenue ning syudad niadtong Abril 16,2025.
Kini human nag-isig-akusahay ang panig ni acting regular COWD General Manager Engr Edna Najeal ug interim General Manager Fermin Jarales nga usa kanila ang tinuyo nga miguba niini.
Miingon si De Guzman nga nakabase sa Camp Alagar nga gisugo na niya si COCPO City Director Col. Salvador Radam nga mohimo sa subsob nga imbestigasyon aron basehan sa pagduso’g kaso kabahin sa hitabo.
Siya miingon nga dili niya madawat nga igo lang maminaw sa matag-pasangil sa magkabanging kampo kay seryoso ang nahitabo sa COWD.
Dugang sa heneral nga makalaum ang katawhan nga magbasi sila sa mga ebedensiya kabahin sa sunod nga lakang nga ilang ikasa sa panghitabo.
Dumduman nga direktang miakusar si Najeal nga grupo ni Jarales ang miguba sa pultahan aron makasulod sa opisina ug pangkuhaon ang mga papeles.
Apan sa panig usab ni Jarales,gitudlo niya ang grupo ni Najeal nga maoy nanglungkab sukad pa sa Abril 15 sa iyang opisina diin nakabase ang mga dokumento nga dad-on unta niini paggawas.
Hisayrang nagka-komosyon sa dihang gidala na ni Jarales ang mga dokumento ug nasakay sa iyang sakyanan apan gibabagan sa mga empleyado nga dapig kang Najeal rason mi-aparta si Radam ug gi-kustodiya ang mga papeles sa COCPO headquarters alang sa imbentaryo.
