(Update) CAGAYAN DE ORO CITY – Nasakitan ug gikadismaya ni Bukidnon Provincial Police Office Director Police Col. Reynante Reyes ang pasangil nga tigdawatan kini’g nilibong salapi ubos sa giingong ‘Alive Scheme’ o pagtugot sa pipila ka pulis nga dili mo-duty sa trabaho bugti sa paghatag sa tipik sa ilang kinitaan.
Kini ang tubag ni Reyes batok sa maong pasangil nga nakaabot kang Pres Bongbong Marcos ug Civil Service Commission.
Miingon si Reyes nga saksi ang iyang station commanders nga nagtinarong sila sa pagtrabaho aron mamintinar ang kahusay’g kalinaw sa Bukidnon.
Gawas niini,gipanghimakak usab ni Reyes nga protektor kini sa mga pasugal nga ilegal sama sa sabong ug illegal numbers game sa probinsya.
Samtang wala pa’y igong basehan aron langkaton sa katungdanan si Reyes.
Kini ang gipasabot ni Police Regional Office 10 regional director Brig Gen Lawrence Coop kon angay na ba nga e-relib sa puwesto si Reyes samtang gi-imbestigaran batok sa pasangil sa kurapsyon nga iyang giatubang.
Miingon si Coop nga kamulo pa ang ilang pagpangita sa lig-ong mga basehan aron modu-ot batok kang Reyes.
Nunot niini,gibungkag na sa Camp Alagar ang giingong gitukod nga tracker team ni Reyes nga giingong pantalya aron makahigayon ang anaa sa 30 hangtod 40 ka pulis nga naapil sa ‘Alive Scheme’ bugti sa nasabutan nga balor sa salapi.
