CAGAYAN DE ORO CITY – Gitahasan sa Police Regional Office 10 si COCPO Director Col Aaron Mandia nga resolbahon sa bugnaw nga paagi kon nganong nasudlan sa grupo sa mga sibilyan nga armado sa mga hait nga hinagiban ang pribadong yuta diha sa Landfill,Zayas,Upper Carmen ning syudad.
Kini human unang nagpatoo nga mga lumad ang maong grupo ug gikuha lamang nila ang ilang yutang kabilin aron ihatag sa mga tawo nga walay kapuy-an.
Gibutyag ni PRO 10 spokesperson Lt Col Michelle Olaivar nga nakig-koordinar na sila kang Mandia aron mapangandaman ang posibleng eksena kon mopatim-aw ang tinud-anay nga tag-iya sa titulo sa haos 30 ektarya nga yuta sa lugar.
Una usab niini,nanganti ang usa sa nagpatoong lumad nga si Datu Pab nga andam nila panalipdan ang ilang kaugalingon kon pugson sila nga ipapahawa sa lugar.
Samtang wala maka-uyon ang lehitimong grupo sa mga lumad sa kalit nga pag-ukupar sa nagpatoong mga lumad sa syudad.
Gibutyag ni Bae DayanDayan,chieftain sa Cagayan de Oro City Tribal Council Indigenous Political Structure nga wala malakip sa ilang record nga ancestral domain ang maong yuta.
Dugang niini nga wala sila maka-ila sa maong mga tawo,busa ila kining idangop ngadto sa NCIP 10 aron mahatagan sa katin-awan aron kapungan ang dili maayong hitabo.
Dugtong niini,mismo si officer-in-charge NCIP Provincial Officer Fundador Binahon Jr ang miingon nga wala sila makaila sa maong grupo nga mi-ukopar sa pribadong luna ning syudad.
Gibutyag ni Binahon nga ilang sutaon kon tinuod ba ang pag-angkon sa mga nagpatoong lumad nga sakop sa ancestral domain ang maong yuta.
Gitin-aw ni Binahon nga wala mo-coordinate kanila ang grupo sa pagsulod sa maong lugar.
