CAGAYAN DE ORO CITY-Malinawon ang unang adlaw sa campaign period sa mga kandidato sa tibuok rehiyon kagahapong adlawa.
Sumala ni Police Regional Office o PRO-10 spokesperson Police Supt Surki Serenias nga wala sila’y nadawat nga election related incidents sa tibook rehiyon.
Gani, naglaum si Serenias nga magpabilin ang pagkamalinawon sa tibook Northern Mindanao hangtud mahuman ang May 2019 midterm elections. Kahinumduman nga gipaubos sa Comelec election red hotspot ang Mindanao.
Samtang gidayeg sa mga personahe sa City Comelec Office ang mga kandidato nga nangampaniya sa syudad kagahapong adlawa.
Miingon si City Comelec Officer Atty Ramil Acol nga gawas nga nagmalinawon ang unang adlaw sa campaign period, gisugdan na usab sa mga kandidato ang pagpanguha sa ilang mga campaign materials nga nakasupak sa ilang mga gabayan.
Una nang miapelar ang Commission on Elections o Comelec sa mga kandidato nga sundon ang palisiya ug gabayan sa pagpangampaniya ilabina nga dili sila magpanuko sa pagkaso ug pag-disqualify sa mga kandidato nga makasupak sa ilang regulasiyon.
