CAGAYAN DE ORO CITY – Kumpiyansa ang Filipino community nga nakabase sa Canada nga masakmit sa unang higayon sa Toronto Raptors ang kampeonato batok defending champion Golden State Warriors sa NBA finals ning tuiga.
Kini tungod sa gibatunan nga kalig-on sa depensa ug opensa sa Raptors nga napakita nila batok Warriors sa unang hugna sa dula sa NBA sa miaging semana.
Gibutyag sa Bombo Radyo ni Pinoy worker William Quimco nga taga-Davao City apan nanimuyo na sa Toronto nga kon makuha sa Raptors ang perfect game plan batok Warriors,hayan kutob ra sa ikalimang dula ug mag-kampeon na ang team.
Siya miingon nga kon dili gihapon makadula sa si Kevin Durant,mas mapasayon kanila ang pagsakmit sa kampeonato kontra GSW.
Nagtoo usab kini nga andam na ang Raptors sa dad-on nga game adjustments sa Warriors nga unang napildi sa game 1 sa miaging semana.
Nasayran nga gawas kang Kawe Leonard,lig-on usab ug giproblemahan sa Warriors si Cameroon player Pascal Siakam nga nagbaton sa all around game movement.
