CAGAYAN DE ORO CITY-Ikonsiderar sa gobierno nga testigo ang caretaker sa dinakpan nga si kanhi Marawi City Mayor Fajad ‘Pre Salic sa oras nga ipasaka nila ang dugang kaso sa korte diha sa Gingoog City,Misamis Oriental.
Kini human gi-ronda sa PNP-10 kuyog ang Martial Law Special Action Group o ML-SAG ang ika-lima nga balay ni Salic nga nahimutang sa Magsaysay sa lalawigan kagahapon sa buntag.
Namahayag si PNP regional spokesperson Supt Lemuel Gonda nga nakuha gikan sa pinuy-anan ni Salic daghang granada ug paraphernalia paghimo’g bomba.
Gibutyag ni Gonda nga maoy ubos sa kustodiya sa gobierno ang caretaker ni Salic nga si Angelita Sulla.
Sa miaging mga semana,sunod-sunod nga gi-ronda sa ML-SAG ang upat ka balay ni Salic ning syudad diin daghang kontrabando nga naglakip sa mga armas ug shabu ang nabawi.
Samtang gikompirmar ni C/Insp Esperideon Biado III sa Misamis Oriental Provincial Police Office nga ubay-ubay ka mga granada ug kapin kilo sa abo nga powder ang ilang narekober sa beach house ni Salic sa Magsaysay ning lalawigan kagahapong adlawa.
Miingon si Biado nga gipadala na nila sa PNP crime lab ang mga na-rekober nga powder aron sutaon kon sagol ba kini sa paghimo sa iligal nga druga o paggama sa improvised explosive device.
Si Salic ang nag-atubang usab sa kasong rebellion tungod sa pasangil nga suporter sa kagubot sa giyera nga mugna sa grupong ISIS-Maute sa Marawi City.
