CAGAYAN DE ORO CITY-Napasaka na ang patung-patong nga kasong kriminal batok kang Supt Maria Christina Nobleza kuyog sa iyang caretaker diin nakuha gikan sa iyang pinuy-anan ang gamit paghimo’g bomba ug mga armas nga kulang sa papeles diha sa Brgy Casisang,Malaybalay City,Bukidnon.
Gibutyag ni CIDG-Bukidnon head C/Insp Brian Panganiban nga kabahin sa gikasuhan si Abdullah Sulayman Dungon Sabdani sa piskalya sa maong lugar kagahapong adlawa.
Apan wala una nila mahatod sa provincial jail si Sabdani kay nangayo kini’g preliminary investigation o PI batok sa mga sumbong nga gipasaka kaniya sa kapolisan.
Hulaton usab sa CIDG nga i-mando sa korte nga ipa-presentar si Nobleza sanglit sa iyang pinuy-anan nakuha ang daghang armas,mga bala ug kagamitan paghimo’g bomba.
