Dili angay ikahibudlong sa mga Pilipino ang gipagawas nga caricature video sa China nga naghulagway sa mga pinoy isip unggoy tungod kay normal kini nga matang sa diskurso sa politika sumala sa geopolitical analyst nga si Prof. Lucanus Azrael T. Igot.
Gipasabot sa eksperto nga sa milabay nga mga katuigan, naandan na ang paghimo og susamang mga drowing ilabi na isip tubag sa mga lakang sa China sa pag-okupar sa West Philippine Sea.
Hinuon, giklaro ni Prof. Igot nga wala makadawat og opisyal nga reaksyon ang maong mga insidente, lakip na gikan sa United Nations, tungod kay nasabtan kini nga usa ka porma sa intimidation.
Sa laing bahin, gipamatud-an usab sa analyst nga dili tanang opisyal sa China ang pabor sa pag-angkon sa West Philippine Sea tungod kay adunay ubang mga diplomat nga nagtuo nga angay tahuron ang desisyon sa tribunal niadtong 2016.
