CAGAYAN DE ORO CITY – Magkuyog gihapon alang sa padayong tinguha pagkab-ot sa medalyang bulawan sa boksing si back-to-back Olympian Carlo Paalam ug ABAP coach Elmer Pamisa.
Kini human pakyas makuha sa duruha ang gold medal sa boxing sa pag-apil sa Paris Olympics ning tuiga.
Namahayag si Coach Pamisa nga mismo si Carlo ang misulti kaniya nga dili kini mohunong hangtod nga mahatag ang maong medalya sa Pilipinas.
Siya miingon nga mihangyo usab si Carlo nga dinhi na sila mag-training sa syudad ug dili sa Baguio City samtang gipangandaman ang 2028 Los Angeles Olympics sa Amerika.
Pulos nakabalik na si Carlo ug Coach Pamisa sa syudad gikan sa ilang pagbiya didto sa Paris ning semanaha lamang.
Hisayrang dismayado si Carlo sa Paris Olympics kay alang kaniya siya ang daug batok Australian boxer sa quarterfinal round.
