CAGAYAN DE ORO CITY –Kaya apan walay angay ihatag nga kompiyansa si Olympian boxer Carlo Paalam sa pakig-atbang kang 2-time Olympian Galal Yafai gikan sa Britanya alang sa ilang gold medal match sa Tokyo Olympics sa Japan unya sa hapon.
Kini ang gibutyag ni Olympian coach Elmer Pamisa human sa ilang pagporma sa fight plan kon unsaon nga pildihon ang mas edaran nga British boxer.
Miingon si Pamisa nga kuha kaayo na ni Carlo ang mga paagi kon unsaon ang mga lihok sulod sa boxing ring nga dili kini direktang mabutang sa alanganin ug ang pag-atake aron masakmit ang kadaugan.
Apan gipadumduman si Carlo nga dili angayang sobra ang ihatag nga kompiyansa kay sama kaniya ensakto usab sa training ug purisigo pagkab-ot sa gold medal si Galal sa ilang away unya sa hapon.
Dugtong niini,subli mihangyo ang 23 anyos nga si Carlo sa katawhan nga kuyugan ang iyang pamilya nga i-ampo aron matuman ang tahaas niya nga makuha ang medalyang bulawan alang sa nasud.
Una nang napuno sa pagdayeg si Paalam dihang pulos niya gipildi ang mas tag-as kaniya nga ila si Irish boxer Brendan Irvine;Algerian boxer Mohamed Flissi;Uzebekistan boxer Shakhobidin Zoirov ug Japanese boxer Ryomei Tanaka hangtod nga kini nakaabot sa finals ning adlawa.
Samtang gipangandaman na ni City Mayor Oscar Moreno ang mahimong resultad sa away ni Paalam batok Yafai sa Tokyo Olympics unyang hapon.
Miingon si Moreno nga dili una niya mabutyag kon unsa nga insitibo ang matunol sa dakbayan kang Carlo kay hulaton pa niini ang resulta sa maong away.
Apan kuyog sa katawhang Pilipinhon,masaligon ang mayor nga unta si Carlo na ang boksingero nga gikan dinhi sa syudad nga makakuha sa medalyang bulawan sa Olympics alang sa nasud.
Hisayrang sa 97 ka tuig nga pag-apil si Pilipinas sa Olympics,wala pa’y bisan usa ka boksingerong Pinoy nga nakakuha’g gold medal.
