CAGAYAN DE ORO CITY, Philippines – Midawat sa dugang P14 milyones si double Olympic gold medalist nga si Carlos Yulo gikan sa House of Representatives, kagahapon. Gitunol ni House Speaker Martin Romualdez ug pipila ka mga house leaders ang maong kantidad.
Si Romualdez midonar og kinatibuk-ang P6 milyones diin P3-milyon sa matag bulawang medalya samtang kapin sa 300 ka mga magbabalaod ang miamot sa kinatibuk-ang P8-M.
Gihatagan usab nila si Yulo sa Congressional Medal of Excellence tungod sa iyang kalampusan.
Ang tanang mga atleta sa nasod ug bisan ang ilang mga coach nga misalmot sa bag-o lang nga Paris Olympics gihatagan usab og pag-ila sa Kongreso.
Ang mga bronze medalist nga sila si Nesthy Petecio ug Aira Villegas gitunolan sa tag P2.5 milyones matag usa.
