Nakahimo og kasaysayan ang Filipina singer nga si Carmelle Collado human siya mideklarang unang kampeon sa Eurovision Song Contest Asia 2026, nga gipahigayon sa Bangkok, Thailand niadtong Nobyembre 14.
Girepresentar ni Collado ang Pilipinas pinaagi sa awit nga “Sobra-Sobra,” nga nakakuha og kinatibuk-ang 211 puntos, diin 93 niini kay gikan sa mga hurado ug 118 ang gikan sa boto sa publiko.
Misunod sa ikaduhang puwesto ang representante sa Thailand nga si Mang x Daou, nga nakakuha og 170 puntos, samtang nahimutang sa ikatulong puwesto ang Vietnam pinaagi sa mang-aawit nga si Tóc Tiên, nga nakakuha og 164 puntos.
Sumala sa opisyal nga resulta, nanguna si Collado sa duha ka hugna sa pagboto, nga naglakip sa mga puntos gikan sa 11 ka nasudnong hurado ug sa boto sa audience.
Isip unang kampeon sa kompetisyon, siya ang mamahimong pambato sa Asya sa Eurovision Song Contest 2027 nga ipahigayon sa Burgas, Bulgaria. (raniel mahunyag)
