CAGAYAN DE ORO CITY – Sukwahi sa gipalanog sa gobierno nga dili na makahimo’g pagpangatake ang nabiling mga rebeldeng New People’s Army o NPA nga ubos sa Communist Party of the Philippines o CPP, nadamyos kay ilang gisunog ang balor 3 milyones pesos nga cassava facility sa Brgy Siloo,Malitbog,Bukidnon.
Kini human kompirmaha ni Police Regional Office 10 spokesperson Major Joann Navarro subay sa taho sa Malitbog Municipal Police Station kabahin sa hitabo.
Subay sa impormasyon,anaa sa 12 ka armadong tawo ang milusob sa pasilidad diin gipangtapok una nila ang mga empleyado ayha gisunog ug gikuha ang armas sa sekyu ug duha ka radio sets.
Gisaysay usab sa imbestigasyon nga gihimo daw kini sa mga rebelde tungod sa pagpangilog sa yuta sa tag-iya sa maong pasilidad.
Apan wala pa’y tubag niini ang tigdumala sa maong patigayon nga nahiagom sa pagpangatake sa mga rebelde.
Dumduman nga bag-o lang namulong ang militar ug kapolisan nga huyang na ang mga rebelde ilabina sa pagkawala sa tag-as nga mga lideres niini nga naglakip sa namatay nga si Jose Maria Sison.
Hisayrang igo pagkamatay ni Sison sa gihambing sakit samtang naka-exile sa Netherlands, napatay usab sa engkuwentro ang magtiayong Benito-Wilma Tianzon ug Jorge Madlos alyas Ka Oris -Myrna Sularte alyas Ka Malaya.
