CAGAYAN DE ORO CITY – Giaghat ni Cagayan de Oro Archdiocese Archbishop Antonio Ledesma nga maminaw sa Bombo Radyo sa mga ipahigayong santos nga misa matag-Domingo sa buntag diha sa San Agustin Cathedral ning syudad.
Kini nunot sa pagpahunong una sa mga tanang mga santos nga misa tungod sa bahad sa coronavirus disease.
Giklaro ni Ledesma nga mahimo gihapon nga magpakasal ug magpamisa sa minatay ang mga hingtungdan taliwala paman sa iyang gihimong pagsuspenso sa mga santos nga misa sa Simbahang Katoliko.
Siya miingon nga kinahanglang limitahan lang sa mga magpakasal ang ilang bisita nga motambong sa seremoniya.
Giawhag usab niini ang mga namatyan nga mahimong misahan ang ilang minahal sa kinabuhi nga namatay sa ilang panimalay ayha ilubong.
Hisayran nga gipahunong una ni Ledesma ang tanang santos nga misa isip pagsanong sa kusganong hangyo sa gobierno nga ipatuman ang safety precautionary measures sa publiko batok sa nagka-grabeng coronavirus disease sa nasud.
