Nagpahinumdom ang Catholic Faith Defenders (CFD) sa tanan mga ginikanan nga protektahan ang mga bata nga mutambong sa Halloween Parties, kay dili kini selebrasyon nga pang-entertainment o kalingawan, apan, usa kini sa klase sa okasyon nga gihatagan sa mga organizers ang mga dautang elemento nga iselebrar ang ilang pag-exist sa kalibutan, kuyog sa kalingawan sa mga bata.
Sa interbyu sa BOMBO RADYO CDO kang Wendell Talibong, CFD National Vice President for External Affairs, iyang gitin-aw nga ang KALAG-KALAG ug ADLAW sa mga Santos, maoy duha sa labing sagrado nga okasyon sa Simbahang Katolika ug dili kini angayan sagulan sa pagano nga selebrasyon nga gipakuyanap sa Western Countries.
Gipasabot ni Talibong nga ang All Souls ug All Saints Day usa ka espirituhanong kalihokan nga nagpasabot sa communion o kahiusahan sa mga santos ug mga kalag.
Apan bisan sa gipakatag nga impormasyon sa Simbaha, nagpadayong aktibo ang occultismo nga nakigkompetensya batok sa tinuod nga espirituhanong pagsaulog.
Alang kang Talibong ang Halloween Parties usa ka selebrasyon sa demonyo nga padayong gikondinar sa Simbahan.
Kini nga kondemnasyon, nakalatid sa sulat sa Ebanghelo kundiin, ang Ginoo mismo ang mikondinar sa pagano nga kalihukan sa tawo kundiin, gisangyaw nila ang dautan, inay ang kaayuhan.
Maoy gikabalak-an sa grupo sa CFD ang pagsaka sa ihap sa mga batan-ong maposes o masudlan sa espirito sa demonyo kay sakyan kini sa mga tawong miyembro sa kulto.
