CAGAYAN DE ORO CITY – Sugdan na sa mga obispong Katoliko ang ilang lima ka adlaw nga retreat nga himoon sa Transfiguration Abbey sa Malaybalay City,Bukidnon ning adlawa padulong petsa 5 sa Hulyo.
Gibutyag ni Msgr Perseus Cabunoc,vicar general sa Arkidiyosesis sa Cagayan de Oro nga ang pinakaunang tigom sa mga arsobispong kaparian sa Catholic Bishops Conference of the Philippines o CBCP nga gihimo sa Mindanao ang pagsanong sa hagit ni Pope Francis nga angayang makigsandurot usab sila sa mga tumutu-ong Kristiyanos gawas sa ilang tagsa-tagsa ka arkidiyosesis.
Siya miingon mahidangat usab sinaligan ni Pope Francis nga si Secretary of States Archbishop Paul Gallagher gikan sa Vatican dungan ang Papal Nuncio of the Philippines nga si Archbishop Charles John Brown pagka-petsa 3 ug sakaon nila ang mga obispo sa Bukidnon nga nagpaubos sa retreat.
Gilayong sundan usab kini sa ika-128 nga plenary assembly nga himoon na sa beach resort nga nakabase sa Brgy Cugman ning syudad.
Gawas niini,mohimo usab sa magkalahing santos nga misa ang mga obispo sa Divine Mercy Shrine sa El Salvador City sa pagka-Hulyo 6,San Agustin Cathedral sa petsa 7 ug Chali Beach Resort sa pagka- 8 ayha manguli pabalik sa tagsa-tagsa nila ka destinasyon.
Samtang naka-aktibo na ang incident management team o IMT nga panguluhan sa city govt aron direktang maghatag seguridad sa mga Katolikong arsobispo nga modangat sa dakbayan.
Miingon si acting city tourism officer Mark Kenneth Jalapadan nga nakahan-ay na ang ilang ipatuman nga security protocols kuyog sa Police Regional Office 10 ug 4ID,Philippine Army gikan sa pagkuha sa mga delegado sa Laguindingan Airport padulong sa Bukidnon g mismo dinhi sa dakbayan sulod ning semanaha.
Gibutyag ni Jalapadan nga dunay istrikto nga gabayan nga ipatuman ang simbahang Katoliko samtang himoon ang plenary assembly sa mga arsobispo sa Brgy Cugman pagka-petsa 5 ning bulana.
