CAGAYAN DE ORO CITY – Nalugwa ang laing hugna sa video clip diin dili na usa ka tawo ang makita apan upat na nga misulod sa buhatan sa data center room sa Cagayan de Oro Water District o COWD nga unang gipamugos nga mihimo’g pagpanglungkab sa mga importanteng mga dokumento.
Kini alkontra sa gihimong pagpasulod ni interim COWD General Manager Fermin Jarales sa pipila ka sakop sa media aron sungagon ang pasangil nga gipalungkab niya ang buhatan ni on-floating status General Manager Engr Antonio Young gamit ang IT expert nga empleyado sa city government sa miaging Hunyo 24 sa gabii.
Makita sa video ang sunod-sunod nga pagsulod sa upat ka tawo nga naglakip sa IT expert nga nag-awol sa trabaho sa city hall ug dunay pagpamalong sa mga suga sulod sa usa ka opisina diin dunay gipanghilabtan.
Kini ang rason nga namugos ang mga kontra interim officials nga adunay maniobra nga nahitabo sulod sa COWD kay nganong gipasudlan sa laing mga personalidad sa gabiing dako sa maong petsa.
Makita usab sa video nga dili kini ang aktuwal nga opisina sa general manager sa COWD ang gisudlan sukwahi sa gipamugos sa mga kritiko ni Jarales nga nagkatag sa media.
Dumduman nga namugos nang daan si Jarales nga iyang opisina ang gisudlan sa IT expert kay gipaayo ang communication room nga nakabase sa COWD board of directors office.
