CAGAYAN DE ORO CITY-Andam ang Archdiocese of Cagayan de Oro sa pagtabang sa gilusad nga ‘oplan tokhang part-2’ sa kapolisan sa dakbayan.
Apan miingon si Cagayan de Oro Archbishop Antonio Ledesma nga motabang sila dili pinaagi sa pagduyog sa ‘anti-drug operations’ sa kapolisan, kundili pinaagi sa pag-atiman ug pag-rehalibilitar sa mga drug suspects nga ilang madakpan.
Matud ni Ledesma nga pwedeng tapokon sa kapolisan ang mga drug suspect nga ilang madakpan ug sila sa simbahan maoy mag-atiman kanila.
Samtang namugos ang Cagayan de Oro City Police Office o COCPO nga may pipila ka simbahan nga miduyog sa ilang panawagan sa gilusad nga Oplan Tokhang Version 2 sa syudad.
Gibutyag ni COCPO spokesperson C/Insp Mardy Hortillosa II nga sukwahi kini sa pahayag ni Ledesma nga dili sila mouban sa maong programa.
Una niini, gitin-aw ni Hortillosa nga bisan trabaho sa police ang pagsanta sa kreminalidad, gikinahanglan usab nila ang partisipasyon sa katilingban aron masulbad ang mga kremin.
