CAGAYAN DE ORO CITY – Pagdumot ang gitoohan sa kapolisan nga anggulo sa pagpatay sa leadman sa PARASAT cable sa 15th de Septiembre St. Cor.Varquez Sts, Brgy.1, Balingasag, Misamis Oriental.
Giila ang biktima nga si Argie Tresquio, 28-anyos, residente sa Pasil, Brgy Kauswagan ning syudad.
Gibutyag ni Misamis Oriental Provincial Police Director Col Robert Roy Bahian nga nakakita’g lalis ang grupo ni Tresquio samtang nag-inom diha sa Baywalk sa miaging gabii.
Apan dihang papauli na ang ilang grupo, giatangan sila sa unom ka wala mailang lalake sakay sa duha ka motorsiklo ug gipangkulata.
Gibunalan sa hollow block ang ulo ni Tresquio hinungdan sa iyang kamatayon.
Samtang gisinggit sa pamilyang Tresquio ang hustisya gumikan sa kamatayon sa ilang kabanay.
Miingon si Afre Tresquio, igsoon ni Argie Tresquio nga nabalaka sila nga dili makab-ot ang hustiya sa pagpatay sa iyang igsoon ilabina nga nagdagan ang mga adlaw sukad sa hitabo.
Hangyo sa pamilyang Tresquio ngadto sa kapolisan nga paspasan ang imbestigasyon aron masilutan na ang mga responsable sa krimen.
Una niini,mihangyo usab si Balingasag Police Station commander Maj Cecelio Orcullo sa mga nakasaksi sa kremin nga motabang kanila aron mapadali ang pagkab-ot sa hustisya alang sa biktima.
Sa pagkakaron,padayon ang pag-imbestigar sa kapolisan sa hitabo.
