CAGAYAN DE ORO CITY – Gipasalamatan sa pamilyang Pimentel ang katawhan nga miduaw ug mipaabot sa mga pag-ampo kang kanhi Senate Pres Aquilino “Nene” Pimentel Jr sa syudad.
Kini human unang gihangyo ni City Mayor Oscar Moreno ang pamilyang Pimentel nga mahaya sa usa ka adlaw ug duha ka gabii ang senador aron masud-ong sa katapusang higaoyn sa katawhan sa syudad ug lalawigan.
Gibutyag ni PDP-Laban president Sen. Koko Pimentel nga wala masayop ang desisyon sa ilang pamilya nga dalhon sa syudad ang ilang amahan human makita ang pagdagsa sa katawhan nga miduaw sa haya sa tourism hall ning dakbayan.
Gipasalamatan usab ni Koko ang mga tawong mitabang sa iyang amahan nga mahimo niini ang tahas sa pagserbisyo sa nasud.
Samtang nanghinaut si Cagayan de Oro Archbishop Antonio Ledesma nga may mahimugsong politiko sa nasud nga susama ni Pimentel.
Kini human makadayeg si Ledesma sa mga paagi ug performance ni Pimentel isip public servant.
Miingon si Ledesma nga nalipay siya sa balaod nga gimugna ni Pimentel nga local govt code ug cooperative code of the Philppines nga may dakong tabang nga nahatag sa katawhan.
Gidayeg usab sa obispo ang pagka mapinanggaon sa senador sa iyang pamilya.
