CAGAYAN DE ORO CITY-Giawhag ni Cagayan de Oro Archbishop Antonio Ledesma ang katawhan nga dili na tugutan nga subli maigo sa ngilngig nga kalamidad sama sa bagyong Sendong ang syudad.
Gihimo ni Ledesma ang hagit alayon sa pagsaulog sa kalibutan diin aktibo ang Pilipinas sa ika-11 ka tuig nga Earth Hour o EH 2018.
Gihagit sa arsobispo ang publiko nga dili maghinugawan aron kalikayan nga mobalik
kanila ang mga basura pinaagi sa mga pagbaha sama sa nahitabo sa bagyong Sendong tuig 2011.
Giila pa ni Ledesma nga ‘wake up call’ sa katawhan ang miigo nga bagyong Vinta sa syudad sa miaging Disyembre 2017.
Samtang miduyog sa EH observance ang bana-banang mil-500 ka city bikers nga gilakipan sa civilians ug kapolisan ning syudad.
Kini human subli gipakita sa maong grupo ang pagsuporta nila sa environmental protection advocacy nga tinuig gilusad sa dul-ag 200 ka kanasuran.
Miingon si PNP regional spokesperson Supt Lemuel Gonda nga angay paluyuan sa kanunay ang kalihukan kay nag-sentro kini sa pagpanalipod sa kinaiyahan.
Nasayran nga daghang establisimiento sa syudad ang wala moduyog sa Earth Hour celebration.
