CAGAYAN DE ORO CITY-Gidasig ni Cagayan de Oro Archbishop Antonio Ledesma ang mga deboto nga hatagan sa prioridad sa ilang mga pamalandong ang pagkab-ot sa kalinaw sa nasud.
Gihimo ni Ledesma ang hangyo alayon sa pagbalaan sa mga mahal nga adlaw ning semanaha.
Gani,giimbitar usab ni Ledesma ang katawhan nga duyugan ang ecumenical station of the cross nga himoon sa Gaston park sa syudad ning adlawa.
Samtang paglikay sa kasaba ug naghinobrang kalipay.Kini ang pipila lamang sa pahimangno ni Msgr Perseus Cabunoc,vicar general sa San Agustin Cathedral atol sa iyang homiliya Palm Sunday kagahapong adlawa.
Gibutyag nga ang 40 dias panahon sa kuresma maoy timaan nga mapanaminan sa tawo ang kalipay, kasakit,pagkamatay ug pagkabanhaw ni Hesu-Kristo.
Gi-awhag usab ni Cabunoc ang tanan kristohanon nga puy-an ang kinabuhi nga puno sa pagpasaylo ug pag-ampo sa Ginoo,aron makabaton sa kalinaw ang kalibutan.
Samtang wala palabya ni Archdiocese Social Communications Director Msgr Elmer “Kid” Abacahin ang pagsaway sa “popular morality” diin daghang kristohanon ang nalingla niini.
Gibutyag ni Abacahin nga daghan gihapon sa mga trabahante sa gobyerno ug bisan sa uban sektor sa katilingban ang dili makalikay sa pagpangawkaw sa bahandi sa katawhan.
Gisaway usab ni Abacahin ang padayong extra judicial killings sa nasud.
Gitin-aw ni Abacahin nga samtang nagdumdom ang simabahang Katolika sa pasyon ni Hesu-Kristo, wala kini nagpasabot nga hukasan sa katungod ang kapariang mubadlong sa mga nakasala ilabina na sa mga tawong anaa sa gobyerno.
