CAGAYAN DE ORO CITY-Gibulgar ni Cagayan de Oro Archbishop Antonio Ledesma ang giingong pagsulay ug suhol kanila sa Philippine Amusement and Gaming Corporation o PAGCOR bugti sa ilang pag-uyon nga matukod ang casino dinhi sa syudad.
Ang pagbulgar gihimo ni Ledesma dungan sa pagpadayag sa ilang hugot nga pagsupak sa nasampit nga plano.
Matud ni Ledesma nga gihangyo siya sa PAGCOR nga suportahan ang katukuran sa casino kay andam pud silang motabang sa simbahan sa pagtukod ug rehabilitation center alang sa drug addicts apan miingon kini nga iyang gibalibaran.
Namahayag si Ledesma nga dili sila mosugot nga magumon sa sugal ang katawhan sa syudad sama sa mga drug addicts nga nagumon sa ginadiling druga.
Hisayrang nabulgar ang giingong pagpangamang atol sa gilusad nga Cagayan de Oro Press Club o COPC sponsored presscon diin gitambungan sa kadagkuan sa simbahan ug ubang lideres nga supak sa katukuran sa casino sa Philtown Hotel sa syudad kagahapong adlawa.
