CAGAYAN DE ORO CITY-Giawhag ni Cagayan de Oro Archbishop Antonio Ledesma ang tagsa-tagsa nga e-sentro ang ilang mga pag-ampo sa lahutayon nga kahimtang sa kalinaw dinhi sa Mindanao.
Kini maoy pangindahay ni Ledesma mismo sa iyang pagpangulo sa unang misa de gallo diha sa San Agustin Cathedral ning syudad kaganihang kadlawon.
Miingon ang 74 anyos nga obispo nga dili angay limtan ang pangaliya usab alang sa mga biktima sa kagubot sa Marawi City.
Dugang ni Ledesma nga mas mahimong mabulukon ang pagsaulog sa pasko ug pagsugat sa bag-ong tuig kon dili kalimtan sa mga Kristiyano ang pagtabang usab sa katawhang nilupigan sa katilingban.
Samtang ipadayon sa kapolisan inabagan sa militar ang paghatag hugot nga seguridad sa mga simbang gabi ug misa de gallo sa nagkadaiyang simbahan ning syudad.
Kini sa tumong nga dili mabalda ang mga pag-ampo ug pangaliya sa mga manimbahay nga mohimo niini.
Gihimo ni C/Insp Mardi Hortillosa,tigpamaba sa Cagayan de Oro City Police Office o COCPO ang pasalig bisan nahimong generally peaceful ang unang simbang gabi ug misa de gallo nga gipanguluhan ni Msgr Perceus Cabunoc ug Ledesma sa San Agustin ning syudad.
Lakip sa hugot nga bantayan sa kapulisan ang mga tawong magdala sa packbag, ang mga ga shades taliwala nga ngitngit pa ang palibot, ug kadtong mga nagpa-ubos sa ilimnong makahubog.
