CAGAYAN DE ORO CITY-Gihangyo ni Cagayan de Oro Archbishop Antonio Ledesma ang City Council ubos ni City Vice Mayor Kikang Uy nga paminawon ang tingog sa publiko ug simbahang Katoliko nga supak sa planong pagtukod ug casino dinhi sa syudad.
Si Ledesma miingon nga angayang ipadayon sa konseho ang public hearing aron ilang madunggan sa tingog sa katawhan.
Siya namahayag nga angayang lantawon sa city council nga ang isyo sa casino wala lamang nagpunting sa ekonomiya kundili apil na sa moralidad.
Samtang gi-welcome ni Kag. George Goking ang hugot nga baruganan sa simbahang katoliko nga supak sa planong pagtukod sa casino.
Sa pakighinabi sa Bombo Radyo, gibutyag ni Goking nga ang baruganan sa City Council bahin sa nasampit nga plano, mag-agad usab sa baruganan sa publiko ug simbahan.
Mao kini ang rason kon nganong gitakda silang magpatawag ug tigom sa Committee of the Whole sa konseho aron ilang personal nga mabati ang sentimento sa tanang sektor sa katilingban.
