CAGAYAN DE ORO CITY-Gidangop karon sa grupo ni kanhi kandidato pagka-brgy kapitan Nicolas Pogay kang Pres Rodrigo Duterte ang reklamo kabahin sa giingong hukos-pukos nga nahitabo sa precint no.0742A sa Brgy Patag ning
syudad.
Kini human nasapon sa watcher nga si Mark Anthony Octavio nga dunay nakasulod nga election materials sa ballot box bisan wala pa nagsugod ang pagbotar sa Brgy ug SK elections niadtong Lunes.
Miingon ang kapikas ni Pogay nga si Josephine Pogay tuyo nila matin-awan kon nganong nakit-an ang sample ballots sa SK chairman candidate nga si Joel Timbal Jr nga ubos sa team ni re-elected Patag Brgy Kap Mary Cor Calizo.
Samtang nadiskobrehan nga dili lamang ang presinto sa Brgy Patag ang dunay kadudahan nga pagpahigayon sa Brgy ug SK elections niadtong adlaw’ng Lunes.
Kini human unang gireklamo sa magtiayong Pogay nga nasapon sa ilang watcher
nga may sulod nang daan ang ballot box bisan wala pa sugdi ang botasyon sa mga botante.
Miingon si City Election Officer Atty Ramil Acol nga wala unta kadto gilabay sa electoral board sa basurahan aron ipaubos sa imbestigasyon.
Kini ang hinungdan nga gidawat nila ang reklamo sa magtiayong Pogay nga midangop sa Comelec aron matin-awan ang hitabo.
Una niini,bisan ang presinto sa Bulua Central School dunay nadiskobre gihapon sample ballots ug mga detacheable coupon apan walay nag-reklamo.
Samtang susihon ni City Treasurer Ramon Mendoza ang reklamo sa pipila ka kandidato sa Brgy Patag kabahin sa nadiskobreng mga election material nga nakasulod nang daan bisan wala pa masugdi ang piliay sa miaging adlaw’ng Lunes.
Kini human nakurat usab si Mendoza kabahin sa nahitabo sa usa ka presinto sa Brgy Patag mismo sa adlaw sa Brgy ug SK elections sa COC-Phinma sa syudad.
Nagtoo si Mendoza nga posibleng wala maayo’g limpyo sa ilang mga empleyado ang mga ballot box hinungdan nga nagpabilin ang maong mga dokumento nga nakasulod niini.
