CAGAYAN DE ORO CITY – Sugdan na ning adlawa ang pagpatuman sa Executive Order No. 062 o Implementasyon sa Barangay Exit Pass o BEP sa syudad.
Gi-awhag ang mga residente nga kanunay bitbiton ang BEP ilabina kon padulong sa kamerkaduhan ug ang pagsul-ob sa face mask.
Una nang gibutyag ni City Mayor Oscar Moreno nga iya kining gihimo aron malimitahan ang mga tawo nga moggawas sa ilang panimalay ug maubsan ang tsansa nga adunay matakdan sa coronavirus disease.
Samtang gipasalig ni ABC Vice President ug Gusa Brgy Kapitan Marlon Tabac nga walay mga persons under monitoring sa Covid-19 ang mahatagan sa BEP.
Siya miingon nga gimonitor sa Barangay Health Emergency Response Team o BHERT ang kahimtang sa panglawas sa mga residente matag-brgy.
Gani, hugot nga koordinasyon ang gihimo sa brgy officials sa maong mga personahe pagseguro nga dili mahatagan sa passes ang mga nagbaton sa sintomas sa virus.
