CAGAYAN DE ORO CITY – Nasikop sa CIDG-Misamis Oriental ug Cogon Police Stationang brgy kapitan ug igsoon niini nga konsehal samtang nagsugal diha sa Sitio Sto Nino,Brgy 31 sa syudad.
Giila ang mga dinakpan nga silang Brgy 31 Kapitan Diosdado Wabe, 58, Kagawad Jessie Wabe, 45 ug laing duha ka sibilyan nga silang Henry Lomonsod, 43 ug Warren Lee Hancobela, 33-anyos pulos molopyo sa maong lugar.
Miingon si Police Lt Noel Oclarit sa CIDG-MisOr Team nga nakuha gikan sa mga suspek ang mga ebedensiya nga nagmatood sa ilang pagsupak sa balaod.
Gawas sa anti-illegal gambling law,kasuhan usab sa PNP ang mga suspek sa Republic Act 11332 or the Mandatory Reporting of Notifiable Diseases nga kasamtangang gipatuman tungod sa bahad sa COVID-19 sa nasud.
Samtang nadumili una paghatag sa komento si Cagayan de Oro ABC President Kag. Alam Lim sa pagkasikop sa usa ka brgy kapitan sa Brgy 31 ning syudad.
Kini human nasapon sa akto sa mga personahe sa CIDG-MisOr ug Cogon Police Station si Brgy 31 Kapitan Diosdado Wabe nga nagdulag mahjong sa maong lugar.
Gibutyag ni Lim nga iya unang sutaon ang kamatuoran sa maong hitabo.
Dugtong nangayog pasaylo ang pamilyang Wabe sa nahatag nga kaulawon niini diha sa katawhan sa Brgy 31 sa syudad.
Kini human nasikop ang iyang duha ka igsoon nga nagsugal sa maong lugar.
Miingon si Lamberto Wabe Jr nga dili unta madamay iyang igsoon nga kapitan kon wala na kini magpinayak pa’g apil apil sa maong pasugal.
Gitahaod usab nila ang PNP nga midakop sa iyang duha ka igsoon kay klaro man nga may nasupak sila nga balaod.
