CAGAYAN DE ORO CITY-Iduso sa taxpayer nga si Atty James Judith ang reklamo ngadto kang Pres Rodrigo Duterte batok Brgy 33 Kapitan Conrad Lim ning syudad.
Kini aron pahamtanga’g silot si Lim tungod sa ilegal nga pag-okupar sa yuta diin gitrabaho ang coastal road diha sa Brgy Lapasan sa syudad.
Supakon ni Judith ang plano sa DPWH-10 nga moduso’g expropriation proceedings aron makuha’g balik ang yuta kay ilegal ang pag-angkon ni Lim niini.
Kontrobersyal ang P4-B nga coastal road project tungod kay dul-ag 10 ka tuig na nga wala pa gihapon nagamit gumikan sa reclamation area ni Lim sa lugar.
Samtang namugos si Lim nga legal ang iyang paghupot sa reclamation area diin kamulo gitukod ang coastal road sa Brgy Lapasan ning syudad.
Si Lim miingon nga ensakto lamang nga i-agi sa expropriation proceedings sa gobierno ang maong luna kay kumpleto siya sa papeles niini.
Gipasalig ni Lim nga andam niya kining i-uli sa gobierno paghuman sa expropriation process.
Nagpasabot lamang kini nga pabayran ni Lim sa gobierno ang ilegal niya nga pagkuha sa yuta.Una niini,gipanalipdan ni City Coun Dometilo Acenas Jr si Lim kabahin sa maong kontrobersya.
