CAGAYAN DE ORO CITY-Giangkon ni Oro Chamber’s Pres. Robert Pizzaro nga nakaapekto sa ekonomiya sa dakbayan ang traffic congestion nga gidulot sa palpak nga pagtrabaho sa DPWH-10 ug UKC builders diha sa Igpit, Opol, Misamis Oriental.
Giangkon ni Pizzaro nga daghang mga negosyante ang nagreklamo kay nalangan ang delivery sa ilang mga prodokto sa merkado sa syudad.
Si Pizzaro miingon nga angayang mohimog aksiyon ang mga hintungdang ahensiya sa gobyerno aron masulbad ang maong problema ug dili na kini subling mahitabo.
Sa pikas bahin,ipaabot sa Philippine Councilors League o PCL Region 10 ngadto kang Pres. Rodrigo Duterte ang palpak nga pagtrabaho sa DPWH ug UKC Builders sa tulay sa Igpit, Opol nga nakahatag kahasol sa publiko.
Gibutyag ni PCL Regional Chairman Atty. Owen Garcia nga dili angayang palabyon ang nasampit nga suliran ug kinahanglang masayran kini ni Pres. Duterte.
Miingon si Garcia nga gitakda usab nga ipatawag sa City Council ang kadagkuan sa DPWH ug UKC builders aron makahatag silag katin-awan bahin sa maong panghitabo.
