CAGAYAN DE ORO CITY – Daw nawala na ang panultihon nga ‘light at the end of the tunnel’ nunot sa kampanya nga ubsan ang positibong kaso sa COVID-19 dinhi sa dakbayan.
Kini human miprangka si City Health Office epidemiologist Dr. Joey Retuya nga hayan malabwan pa ang 103 ka bag-ong kaso sa bayrus sa syudad nga natala sa miaging adlaw’ng Martes.
Miingon si Retuya nga paggawas sa katawhan aron maglulinghayaw sa ubang bahin sa rehiyon ug pagtambong sa tapok-tapok ang pinaka-nakita niini nga direktang rason sa paspas nga pagsaka sa kaso sa bayrus sa syudad.
Dugtong niini,nalatid sa DoH -10 COVID-19 briefer no. 467 nga giingong anaa sa 13 ka pasyente gikan sa rehiyon ang namatay nga siyam ang gikan mismo dinhi sa syudad.
Sa 260 usab ka bag-ong napuno nga kaso sa rehiyon kagahapong adlawa,140 niini ang gikan sa dakbayan,51 sa Bukidnon; 26 sa Misamis Oriental; 23 sa Misamis Occidental; 4 sa Lanao del Norte ug 1 sa Camiguin.
Gumikan niini, ang total covid cases sa rehiyon anaa na sa 17,426; anaa sa 13,868 ang recoveries; 566 ang death toll ug dul-an 3-mil ang aktibong kaso sulod sa usa ka adlaw.
