CAGAYAN DE ORO CITY – Giawhag ni City Councilor Edgar Cabanlas ang iyang mga kaubang konsehal nga mohimo’g lakang aron mabatukan ang pagkatag sa COVID-19.
Kini dihang naalarma si Cabanlas human masayran nga adunay local transmission sa coronavirus disease sa syudad.
Gibutyag ni Cabanlas nga 14 ka adlaw gikan karon, lauman matud pa ang pagsaka sa kaso sa COVID-19 ilabina kung wala sila’y buhaton aron masumpo ang bayrus.
Siya miingon nga kinahanglang seguradohon sa lokal nga kagamhanan ang ihap sa mga medical staff ingon man mga gamit sa intensive care unit sama sa higdaanan ug ventilators.
Samtang gihagit ni kanhi IBP Misamis Oriental -CdeO chapter president Atty. Ed Cuaresma ang public officials sa syudad ug lalawigan nga magpakitang gilas ning panahon nga nag-atubang sa krisis ang nasud.
Gibutyag ni Cuaresma nga karon ang insaktong higayon nga tumanon sa mga politiko ang mga gipangsaad sa katawhan.
Una niini,nakasaway ang pipila sa mga opisyal sa syudad ug lalawigan kay maayo lamang sila pagdalikyat sa mga kabalayan sa miaging kampanya apan lisod makit-an sa panahon nga may bahad sa coronavirus ang nasud.
