CAGAYAN DE ORO CITY – Gihangyo karon ni Supreme Court chief Justice Diosdado Peralta ang Kongreso nga mopasar sa balaodnon nga direktang maghatag proteksyon sa mga piskal ug huwes sa nasud.
Kini human sayun-sayon na lamang ang pagpatay sa mga huwes nga dili gani sila makapanalipod sa ilang mga kaugalingon batok sa mga tawong kriminal.
Gihimo ni Peralta ang hangyo tungod sa kamatayon ni Judge Mario Baniez nga gi-ambush sa wala mailang mga suspek samtang sakay sa sakyanan sa San Fernando,La Union sa miaging semana.
Samtang uyon si Cagayan de Oro 2nd District Rep Rufus Rodriguez nga hataga’g security marshalls ang mga huwes ug piskal dinhi sa nasud.
Kini aron dunay direktang makapanalipod kanila batok sa mga tawo nga nagtinguha sa ilang mga kinabuhi.
Gihimo sa kongresista ang katin-awan tungod sa mismong hangyo ni Chief Justice Diosdado Peralta nga tabangan sila sa Kongreso nga mahatagan sa seguridad ang mga huwes.
Dumduman nga bisan dinhi sa rehiyon,pipila ka kaso sa pagpatay sa piskal ang natala nga wala pa gihapon nasulbad sa mga otoridad.
