CAGAYAN DE ORO CITY-Ipatawag pagbalik sa komitiba sa trade and commerce sa konseho ang naglangkob sa Freeman Traders Club o FTC nga dunay online encrypted currency invesment ning syudad.
Kini aron pangayua’g katin-awan kon nganong nagpadagan sila sa ilang negosyo gamit ang ‘Plutous coins’ nga walay mahistro sa hingtungdang mga ahensiya sa dakbayan.
Miingon si Kag George Goking,chairman sa komitiba nga natultulan na nila ang pinuy-anan sa founder sa FTC nga si Mark Freeman pagsiguro nga motunga kini sa hearing .
Nasayran nga daghang propesyonal ang nadani sa maong patigayon tungod sa mga saad nga gitanyag sa grupo ni Freeman.
Samtang gihagit ni Security and Exchange Commission o SEC regional director Atty Reynato Egypto ang mga investor nga moduso’g reklamo kon ugaling nakita nila nga dehado sila sa ilang investment ubos sa Freeman Traders Club sa syudad.
Kini aron lig-on ang mahimong aksyon sa gobierno kon ugaling mapamatud-an nga ilegal nag-operate ang maong negosyo sa dakbayan.
Miingon si Egypto nga gawas sa usa ka investor nga nagreklamo gikan sa Butuan City batok Freeman,gikinahanglan nila ang dugang 20 ka reklamo aron lig-on ang imbestigasyon kabahin niini.
Nasayran nga sa Butuan City,anaa sa dul-ag 7 milyon pesos nga investment capital ang nabutangan sa aanganin kay daw mipaltos na paghatag ang maong grupo sa ilang mga investor.
