CAGAYAN DE ORO CITY – Mosugod na ang nagkadaiyang sporting events sa mga publikong tunghaan ubos sa DepEd 10 alayon sa tinuig nga Northern Mindanao Regional Athletics Association on NMRAA sa syudad karong adlawa.
Kini human buksi ni DepEd 10 regional director Arturo Bayucot ang Cagayan de Oro-El Salvador-Misamis Oriental cluster sa palarong pampook sa Pelaez Sports Center kagahapon sa hapon.
Misakshi sa maong kalihukan ang kadagkuan sa nagkadaiyang dibisyon sa DepEd ingon man sila Gov.Peter Unabia,1st District Cong. Christian Unabia ug 2nd District Cong. Bambi Emano.
Himoon ang 3rd cluster ug 4th cluster opening sa kalihukan sa Gingoog City ug Camiguin.
Sa unang cluster opening sa Lanao del Norte,nangharos ang mga atleta gikan sa Misamis Oriental nga dunay 78 ka mga medalya sa miaging semana.
Samtang gipadumduman sa duha ka atletang kongresista nga si Unabia ug Emano ang mga bagitong mga magdudula sa palarong pampook nga kanunay itamod ang tinud-anay nga diwat sa pagsilbing ‘isports’ ngadto sa ilang kadaugan ug kapildihan.
Miingon ang duha ka magbabalaod nga nahimo usab nga mga atletang sa ilang panahon nga dili lang kanunay ang kadaugan ang huna-hunaon sa matag-dula apan ang kalambuan nga mahatag niini sa tagsa-tagsa ka kaugalingon.
Hisayrang pulos naghatag sa suporta sa programang sports sa kapitolyo ni Unabia ang duha ka sports-minded nga mga magbabalaod sa lalawigan.
