CAGAYAN DE ORO CITY- Gawasnon na ang empleyado sa city nga unang nasikop sa entrapment operation sa kapolisan tungod sa pasangil nga nangilkil sa usa ka manager sa karnabal diha sa Brgy Macabalan sa syudad sa Lunes sa hapon.
Kini human kalit gisibog sa biktima nga si Rosalie Castillo ang kasong extortion ug usarpation of authority batok kang special investigator 3 John Laro nga nadestino sa City Legal Dept sa city hall ning syudad.
Miingon si Macabalan Police Station commander C/Insp Ernesto Daing nga nakurat na lamang sila kay nagdala na’g affidavit of dissistance si Castillo hinungdan napugos sila pagbuhi kang Laro.
Si Laro ang una nang giakusahan ni Castillo nga nangayo kaniya sa libuang salapi sa tuig 2016 ug sundan usab unta kini ning semanaha apan gipasikop na sa kapolisan.
Samtang ipaubos ni City Administrator Dionne Gersana sa suspension si special investigator 3 John Laro.
Kini kon may gimbug-aton ang pasangil nga nangilkil kini’g libuang salapi gikan sa manager sa karnabal diha sa Brgy Macabalan sa syudad.
Miingon si Gersana nga mimando na si City Mayor Oscar Moreno nga ipaubos sa imbestigasyon si Laro tungod sa makauulaw nga binutan niini.
Si Laro nga may suluhan nga P34-mil ang bulan ang nagsilbi usab nga secretariat sa regulatory complaint board o RCB diin sulod sa iyang pagtrabaho ang mga pagpalugwat o pagdis-approve permit sa mga kalingawan sama sa carnabal diha sa Brgy Macabalan sa syudad.
Samtang pagkatangtang sa trabaho ang dangatan sa empleyado o opisyal sa gobierno nga makit-ang sad-an sa paghimo’g anomaliya ilabina sa pagpangawkaw o kurapsyon.
Kini ang kusganong bahad ni Civil Service Commission o CSC regional director Adams Torres sa mga trabahante sa gobierno aron makalikay sila paghimo’g iskandalo nga makaapektar sa ahensiya diin sila nagtrabaho.
Gihimo ni Torres ang pagpadumdom tungod sa pagkasikop sa empleyado sa city hall diin gi-alegahan nga nangilkil sa nilibong salapi gikan sa manager sa carnabal diha sa Brgy Macabalan sa syudad.
