(Update) CAGAYAN DE ORO CITY-Dili palabyon ni City Mayor Oscar Moreno ang gihimo sa usa ka empleyado sa city hall nga giakusahan nga nangilkil ug salapi ngadto sa manager sa karnabal diha sa Brgy Macabalan ning syudad sa miaging adlaw.
Kini human unang nasikop sa kapolisan si John Laro kinsa nagsilbing special investigator 3 sa city legal office gumikan sa pagpangayo’g salapi sa biktima nga si Rosalie Castillo.
Miingon si Moreno nga mahimong nakalusot ni Laro sa kasong kriminal apan dili mahitabo nga palabyon lamang ang silot niini gikan sa iyang opisina.
Una nang gipapha ni CdeO Legal Office head Atty Donald Delegencia si Laro diin gilayong gimando ni Moreno nga didto kini sa iyang opisina gipa-report samtang giimbestigaran pa ang pasangil nga giatubang niiini.
Hisayrang mohimo na unta sa pag-rebyo si Laro aron mohimo’g bar examination ning tuiga.
