Padayong giabrihan ang pipila ka evacuation centers sa dakbayan sa Cagayan de Oro human nausab bundakan sa kusog nga pag-ulan ang syudad sa miaging gabii.
Sumala ni City Social Welfare and Development (CSWD) Disaster Head Sofia Tongson, miabot na sa 1,417 ka mga pamilya ang ilang naitala nga mi-evacuate sa nagkadaiyang evacuation centers sa tibuok Cagayan de Oro sukad pa niadtong Huwebes.
Butyag ni Tongson, nagpabiling abri ang mga evacuation sites sa mga barangay sama sa Agusan, Bugo, ug Cugman, aron padayon nga maserbisyohan ang mga pamilyang naapektuhan sa pagbaha ug landslide.
Hisayran usab nga wala pa gipapauli ang mga residente sa kasilinganan sa pamilyang Lariosa, nga nahimong biktima sa landslide sa Barangay Agusan.
Sa pagkakaron, anaa pa sila sa evacuation site sa Agusan isip preventive measure, tungod kay gihunahuna nga humok pa ang yuta sa maong lugar nga posibleng magpahinabo og laing landslide.
Sa laing bahin, wala magpasagad ang City Government sa Cagayan de Oro sa paghatag og tabang, pinaagi sa community kitchens nga gidumala sa matag barangay council, aron masiguro nga adunay pagkaon ug tabang ang mga pamilyang naapektuhan sa kalamidad.
