CAGAYAN DE ORO CITY-Gisusi sa City Price Monitoring Council Committee kauban ang mga personahe sa Dept of Energy o DoE ang gasoline stations sa syudad.
Kini aron masiguro nga wala mamintaha ang mga negosyante ilabina sa pagtubil nila sa mga motorista nga magdangop sa ilang gasoline station.
Miingon si Rodolfo Leal,science research specialist 2 sa DoE nga unang gisusi nila ang Shell Gasoline Station sa Recto-Velez Streets diin nasuta nga wala makalapas sa lagda sa ahensiya.
Miingon si Leal nga molungtad sa usa ka semana ang ilang paglibot sa mga gasoline station aron masuta ang pagsunod niini sa mga gabayan ug kalikayan ang mga pag-abusar ngadto sa mga kustomer.
Una niini,gibutyag usab ni City Price Monitoring Council Committee head Atty Egay Uy nga pasirad-an nila kadtong mga gasolinahan nga dunay dagkong kalapasan sa balaod.
